السبت، 29 نوفمبر 2008

نفسى اتجن


مش عارفة حاسة بضيق وخنقة مش عارفة ليه الواحد مش قادر يحس بالسعادة اللى كان حاسسها من ست او عشر سنين ليه كل ما بنكبر كل ما مساحة السعادة فى حياتنا بتقل هى دى ضريبة المعرفة للحياة يمكن ده اللى اكتشفته مع الوقت كل ما بتتعامل فى الدنيا بتكشفلك الجانب المحبط والكئيب منها يمكن زمان كانت ابسط الحاجات ممكن تفرحنى مجرد تمشية مع اصاحبى فى ثانوى او الكلية ممكن تكون منتهى السعادة  كانت الدنيا اهدى كانت المسئوليات اقل كان احساس الامان ارسخ ما كناش بنفكر فى بكرة ولا كنا عايزين نعرفه ولا نعرف الدنيا مخبية لينا ايه كنت حابة نفسى اكتر من كده ومرتاحة معاها كنا بنفرح لحاجات يمكن نفتكرها دلوقتى تفاهة كان ممكن افرح لما القى شريط كنت عايزة اشتريه كانت الدنيا ملائكية ولا احنا اللى كنا ملايكة يمكن ما بقيناش شياطين بس حاسة انى بقيت بشر مكتوب عليه كل اللى اتكتب على كل البشر من الالم دموعى بقيت جوايا ويمكن اصعب الدموع هى اللى بتيقى جواك هى اللى بتتحجر  حاسة انى اتغيرت بقيت اكتر عصبية وقابلة للاستفزاز ومتحفزة لقل كلمة والاصعب انى معندتش بعرف اسامح 
بقيت اسهل حاجة باعملها انى اتجنب اللى بيجرحنى سواء كان عن قصد او عن دون قصد ويمكن دى بقيت حاجة بتضايقنى اوى فىنفسى غصب عنى والله بقيت بخاف من بكرة اوى كل احساسى بالامن راح حاسة انى مش ساندة على حاجة معدش عندى ثقة فى حاجة ولا فى حد لو الحاجة ما عملتاش بنفسى تبقى بالنسبة ليا ما تعملتش
الحاجة لازم اشوفها بعينى او اسمعها بودينى علشان اصدقها  وصلت لمنتهى الشك والريبة من الناس اصحابى بقم يتعدوا على الصوابع رغم انى طول عمرى اجتماعية جدا بقيت بخاف من التعامل مع الناس اوى معندتش قادرة استمتع باى متع فى الحياة حتى ابسطها الضحكة بقيت عزيزة وحتى بتبقى خارجة مجروحة  بقى عندىارق شبه مزمن
علشان كده خدوا كل اللى اتعلمته وادونى لحظة سعادة  لو السعادة فى الزمن ده بتساوى الجنون انا مستعدة اتجن ايه فايدة عقل جايب لصاحبه التعاسة بحقد على كل المجانين يا رب لو هما فى راحة يبقى اسالك تناولهالى الراحة اللى هما فيها
سلام من ربع ضارب واربع تربع فى القريب العاجل

الاثنين، 3 نوفمبر 2008

دعوة لزيارة دار الايتام



                                         دعوة للمدونين وغير المدونين لزيارة دار الايتام ببورسعيد

                                              ذلك يوم الجمعة الموافق 14 نوفمبر من الساعة 12الى الساعة2 ظهرا


                                                               ومكان الزيارة حيكون


                                          باذن الله الجمعية النسائية لتحسين الصحة(المؤسسة الايوائية)

                                      بورسعيد- شارع كسرى المنطقة الثانية- امام قسم شرطة المناخ

                                           **************************************

                                    اعمار الاطفال فى الدار تتراوح بين سن 3سنوات و21 سنة 

                                         اكثريتهم  من سن 6 الى 15 سنة سواء من البنين او البنات

                               ********************************************

                            الدار بتقدم جهود ملحوظة لخدمة الاطفال دول بس فى بعض الاحتياجات 

                                       واللى ان شاء الله نحاول نساهم ولو بشكل بسيط فى تقدمها

                          **********************************************

                             والاحتياجات دى ممثلة فى:

                            1- أدوات مدرسية(كشاكيل_كراسات_الالوان خشب وشمع وفلوماستر-كراسات رسم)

                             2 -أدوية الاطفال(خافض الحرارة-ادوية الكحة- الاسهال-البرد-الصداع) 

                             3-المنظفات والمطهرات(الديتول-الكلور-الفنيك) 

                            4-بعض الاحتياجات النظافة الشخصية(صابون-شامبو-زيت او كريم للشعر) 
 
                               5-فى احتياج لمكواة ملابس واحدة لو فى امكانية 

                 ***************************************************** 

والحاجات دى مش فرض دى تتوقف على كل واحد وقدرته ولو حد معندوش الامكانية انه يساهم فيها مش معنى كده أنه

 ما يقدرش يحضر ويشارك معانا لان الاطفال دول محتاجين العطف والحنان أكثر وياريت بجد تلبوا دعوتنا دى

 وربنا يجعلها فى ميزان حسانتكم اللهم تقبل

                ***************************************************** 
ويا ريت اللى حيشرفنا بالزيارة يدينى خبر او داليا(اهو ده عيبه)او ايناس (مدونة أوتار)

ولحد ما نتقابل سلام من ربببببببببببببببببببببببببببببببببببببببببببببببببببببععععععععععععععععع

 ضااااااااااااااااااااااااااااااااااااااارب