عدت ايهاالشقى

كلكم عرفين اغنية يونيك الدف_اقصد فريد الاطرش(عدت يا يوم مولدى عدت ايها الشقى) وانا هنا مش قصدى الشقى اللى جايه من الشقاء والعذاب


لا انا اقصد انت رجعت ليه يا خلبوص انت انا مش كنت حلفة عليك يمين تلاتة انك ما ترجعش تانى وما شفش خلقتك انت ايه بارد ماعندكش دم



هو انا مش كنت متخنقة معاك السنة الى فاتت خناقة لرب السما واتفقنا لاتجيلى ولا ارحلك انت ليه رجعت فى كلامك صحيح انك عيل غور

من هنا ياض ومتورنيش خلقتك العكره دى تانى

اللى فات ده انا وانا بتخانق مع عيد ميلادى

امبارح عقبال عندكم كملت 27 سنة بالتمام والكمال ورغم كده من جوايا مش حسة انى وصلت للعمر ده وكلما حد يقولى كل سنة وانت طيبة

احس انى فى غبيوبة وباذن الله حصحى منها

يا هو الايام بتجرى بسرعة بالواحد كده ليه والمشكلة بقى عندى انى من جوه مكملتش5 سنين على بعض

لسه حاسة انى عيلة صغيرة ومش عرفة اتأقلم مع العمر اللى انا فيه مش لانى بخاف اكبر لاابدا انا عارفة ان دى سنة الحياة بس

حاسة ان عمر الانسان هو عمره اللى حسه مش الموجود فى شهادة ميلاده او بطاقته يعنى ممكن يكون شاب صغير ويحس بانه عنده100

سنة وممكن واحد عده 60 وتحس معاه انك مع شاب لسه بحيويته ونشاطه وديه بتبقى نعمة من ربنا ان الواحد ميعجزش من جواه علشان

بتكون حاجة مؤلمة وخصوصا لما اللى يحصله كده شاب لسه فى بداية حياته والحياة لسه قدامه

عموماعيشوا ونبسطوا الدنيا مش عايزة اللى يقفش ويزود همومه وكفاية الهموم الموجودة فيها خلقة

سلام من ربع ضارب

ليه ربع ضارب

انا ليه عملت مدونة؟

بصم بقى انا اول ما اتعرفت على موضوع المدونات بدات الحكاية على اساس انى اقرا فى حاجة مختلفة بس مع الوقت لقيت نفسى من جوايا

برتبط بمدونات بعينهاواتاثر بيها اد ايه بكيت لما قريت يوميات عيل مصرى وخصوصا موضوع عم محمد واد ايه حبيت يا سوسو

المفقوع مرارتهاودعيت ربنا يقدرها على فيفى ويهديها عليها وكام مرة اتمنيت اركب عجلة فرنسا بس يا ترى ترضى تدينى لفة وحبيت

نصايح ياسمين _البنت دى دماغ_ حبيت شعر اخف دم وخصوصا قصيدة حقى وحقك وعجبنى جدا شعر واحد من الناس دى حبيت فاتيما

_ربنا يرد ليها ابنها_عشقت خفة دم بنت خيخة_ولا خيخة ولاحاجة دى بمليون راجل_عرفت مع كل الناس دى يعنى ايه تحب حد وتحس

بيه مع انك عمرك ما شفته قبل كده ويمكن ما تشوفوش ابدا وده يمكن علشان عشت معاهم فى احلامهم واحزانهم حتى فى تهيستهم يمكن

علشان كده عملت مدونة اكتب فيها اللى بحسه واحس اللى بكتبه_على راى هنيدى_

اما ليه سمتها ربع ضارب يمكن لان ناس كتير قالتلى انت عندك ربع ضارب فى دماغك وعمرى ما اعتبرتها شتومة خالص بالعكس

انا باعتبرها استراتيجيتى فى الحياة انى اضحى بربع علشان التلات تربع التانين ولما الكهربا تزيد اخليه يلسع برحته

فلو لقتونى فى يوم بهيس متقلقوش ده مش منى ده من الربع الضارب

انا مين

رغم انى طول عمرى بكره اللعبة البايخة دى اللى يجى الواحد من وراك وتكون لمحه ويحط ايده على عينك ويقولك بمنتهىالصفاقة_حلوة الصفاقة دى_انا مين ويكون هاين عليك تفتح اقرب شباك ليك وتحدفه منه يمكن يوقع على دماغه وترجعه الذاكرة ويعرف هو مين وساعتها تكسب فيه ثواب

رغم كرهى للعبة دى لكن انا بردواحكون غلسة المرة دى وحلعبها معاكم

اللى دخل مدونة الاخت العزيزة المعزوزة داليا محمد اختى(اهوا ده عيبه)واره موضوع الانسة عند الدكتور ايوة برافو عليكم ايوة انا الانسةالمذكورة

شوفتوا اد ايه صورتى تجنن _زى القمر والنبى يا بنتى_شوفتونى واناعين فوق وعين تحت وليا ست صوابع فى ايدى اجنن والله العظيم

المهم انا اقولكم المرة الجاية انا ليه عملت مدونة وليه سمتها ربع ضارب استنونى


سلام من ربع ضارب